“Buti nga ngayon, kahit paano, nararamdaman mong malamig kahit naka-dos lang; kanina, naka-tres na hindi mo pa halos maramdaman ‘yung lamig dahil lumalaban ‘yung init eh! Bukas nito, mamaya nito, kapag nagkarga ako ng LPG, iiyak ako. Diyan na mapupunta lahat ng pera ko. Sobrang init eh. Malakas kami sa gas kapag ganyang sobrang init. Lalo na pag nag-number three ka ng aircon, naku po! Isang oras akong naka-number three kanina! Mula alas-dies, alas-onse, alas-dose; ngayon lang ako nagbaba, o, dahil naramdaman kong malamig na eh.

“Hindi mo napansin, nakabuka ‘yung hood ko? Hehehe. Para may singawan ‘yung init ng makina! At March palang ngayon! Mas matindi ‘yan pagpasok ng April. Eh ano pa, El Nino pa. Kanina nga nagkulimlim na eh, nung umaga? Makulimlim na kaninang umaga eh. Sabi ko, ‘Ituloy mo na, iulan mo na ‘yan!’ Eh wala, hindi umulan.

“Ayan o ‘yung salamin, ang init. Hehehe. Sobrang init kung wala ‘yang tinapal ko diyang papel. Sobrang init sa balat niyan, kapag hindi ka naglagay ng cover na ganyan! Wala eh, bawal naman ang tint sa taxi eh.

“Kapag ganyang mainit, marami, maraming nag-o-overheat diyan na taxi. ‘Yung mga luma. Itong mga ganitong medyo bagu-bago pa, lumalaban ng konti. Ang dami kong nadaanan kanina eh, sa gasolinahan, ang daming nag-overheat! Hehehe.

“Itong sa akin naman, hindi nag-o-overheat, kaya lang, ayaw lumamig nung aircon kasi ‘yung sa compressor eh, nahihirapan siya. Binabasa ko nalang siya. Kapag nabasa na, mararamdaman mo, pipitik ‘yung aircon, mag-o-automatic. Pag pasok mo sa loob ng oto, malamig na! Lalamig na uli ‘yan. Iba ‘yung lamig nung pag nag-automatic ‘yung compressor.

“‘Yang airport taxi na ‘yan, bago ‘yan. Hindi madaling mag-init ‘yan. May binenta na silang ganyan dati, ganyang modelo. Yellow plate ‘yan, at iba’t iba ang may-ari. Hahaha! Ano ‘yan eh, parang korporasyon siya. Ngayon, puro airport taxi sila, kaya lang ang may-ari, iba-iba. Kunwari, sampung unit, kay Chavit, tapos ‘yung sampung unit, kay Pacman. Parang ganun ba, parang kabit-kabit sila. Kung sino ‘yung malalakas sa administrasyon, sa nakapuwesto, ‘yan ang nagmamay-ari ng mga taxi na ‘yan.

“Noong araw, di ba, ‘yung si Ramos pa yata ang nakaupo, ‘yang mga airport taxi hawak ni ano, may-ari si Matt Ranillo. Mayroon pa rin siya na units na nandoon ngayon sa airport, kaya lang hindi na tulad ng dati na talagang monopolized niya, na kanya lang ang nandoon.

“Kami nga eh bawal kami sa arrival eh! Puwede kaming maghatid, pero doon lang sa departure, doon sa arrival bawal na kami.

“Dito ka na ba bababa, sa Unitel? Puwedeng dito ka nalang bumaba sa tapat ng tindahan?”

- Mamang Drayber